بعد فترة طويلة من العناء والتعب اللي سببته السياسة واللي طلع من غير فايدة او ايجابيات قررت انا وغيري كتير اننا نخرج نفسنا من حاجات لا تعود علينا باي فائدة وبدل ما نتكلم ونهاجم بعض وبس قررنا نهتم ببلدنا اكتر اننا نتعلم كويس ونعوض الحاجات اللي المدارس موفرتهاش ... في جمعيات خيرية كتير في مصر بتهتم بالعمل الخيري التطوعي منها رسالة وصناع الحياة وزاد وغيرهم كتير ومشكورين علي مجهودهم وان شاء الله يكون في ميزان حسناتهم لكن في رأيي ان اكبر عمل تطوعي المفروض يكون طلب العلم وتعليم الناس . ازاي تلاميذ المدارس اللي بينجحوا ويجيبوا درجات عالية بيعانوا من الامية!!! حاجة تضايق مش بيعرفوا يقروا او يكتبوا واسمهم بيتعلموا وبيروحوا مدارس . مش عارفة العيب علي المدرس ولا التلميذ نفسه ولا اهله اللي مش بيتابعوه وكل همهم النجاح وبس ودا اللي بتوفره المدرسة طبعا بالغش . في مدارسنا بيغششوا الطلبة في مادة الدين بيملوهم الايات من القران مدرسين زمن ايه اللي بيعموا كدة وفعلا يستحق المدرسين اللي بيحصلهم وعدم احترام الطلبة لهم . كل همهم ان مستوي الطلبة يكون متدني علشان ياخدوا دروس عندهم وما شا الله اغني الناس في مصر هما المدرسين خاصة مدرسين الثانوي وعليه لابد اننا نقفل المدارس مبقاش ليها اي تلاتين لازمة ونخلينا ف الدروس اهي علي الاقل بتدخل طب وصيدلة و هندسة والباقي طبعا بيترموا ف تجارة واداب وحقوق . دا غير بعد التخرج مفيش شغل لان الشهادة اللي بناخدها لا ترقي للمستوي اللي بيطلبه سوق العمل . الجمعيات الخيرية بتجاهد وبتعمل دروس تقوية لكن مش هتحقق النجاح اللي ممكن تحققه المدارس لو التزمت برسالتها . الان بقينا زي ما قال دكتور مصطفي محمود اننا هنكون بالنسبة للغرب مثل القرود
ليست هناك تعليقات:
إرسال تعليق