بعد الغزوة , معركة الدستور

بادئ ذي بدء انا مسلمة ومعتزة بديني ومش معني اني بهاجم الاسلاميين يبقي بهاجم الاسلام لان الاسلام اكبر من الاشخاص بكتير ولا يمكن مقرانته بهم
لكن اسلوب الاخوان في تعاملهم مع الاخر هو اللي يستحق التعليق . الثورة مقمش بيها فصيل معين علشان يستاثر بنتائجها وينسب لنفسه كل الفضل في حشد الاعداد الكبيرة ويستهزا بالاصوات المخالفة ليه بحجة هدم الدولة .
وصلنا لمرحلة تقريبا انكشفت فيها كل الفصائل وبانوا علي حقيقتهم  وعرفنا مين اللي ثار لمصلحته الشخصية ومين اللي ثار علشان حال البلد كان يستوجب ان دا يحصل .
مشكلة الثوار انهم اعتمدوا علي غيرهم  وحاولوا يبقي لهم علاقة بالاسلاميين شايفة انها كانت نفاق مصالح  ف النهاية العلاقة لم يكتب لها الاستمرار لانها كانت لهدف واحد هو اسقاط نظام ولما سقط مفيش اي حاجة تستوجب انهم يكملوا , خالتي وخالتك واتفرقوا الخالتين .
الاستفتاء كان بداية الصراع لان البعض من الطرفين حوله لمعركة  حول المادة الثانية وكاننا بناقش حاجة اصلا لم تطرح للنقاش .
والمواطن لايص في النص خاصة لما تحول الموضوع لحرام وحلال _غزوة الصناديق_ واللي انتصر فيها الاسلاميين علي اعدائهم انتصارا ساحقا و 77%
تاتي بعدها لعبة كراسي البرلمان وفاز باغلبيتها ايضا الاخوان :  (انتخبوني يرحمكم الله )
مهازل طبعا كنا بنشوفها علي الشاشة تقول عيال صغيرين بيتخانقوا علي اتفه الاسباب وسايبين البلد تضرب تقللب.
نييجي بقي لسباق الرئاسة واغلب المرشحيين ذوو الثقل بردوا اسلاميين
واخر مسمار في النعش هوووو قرار الجماعة انهم ينزلوا الشاطر للعب في الساحة  بعد ما وعدونا بانهم مش هايخدوا الرئاسة كرما منهم طبعا , هما عا يزين اغلبية برلمانية بسسسس
من الماضي الغير مطمئن دا احب ابشركم بمعركة الدستور القادمة وربنا يستر بقي مش عايزين خساير اكتر من اللي حصل

صور الاقصر

الاشتراكيين الثوريين علي حق

كلمت اتحاد شباب الاقصر علشان مشكلة بابا ووقالولي ان ليهم وسيلة اتصال مباشرة مع المحافظ ويقدروا يقدموله الشكوي . بس مش حاطة امل عليه لاني سمعت وقريت انه مش بيعمل حاجة وفي ناس كتيييييييير ندمت انها ثارت ضد المحافظ السابق اللواء خالد فودة ودلوقتي بعد اللي شافوه من الحافظ الحالي بيقولوا ولا يوم من ايامك يا فودة .
ناس كتير شايفة ان الدنيا كانت ماشية كويسة بعد الثورة مباشرة ولكن بعد فترة مش طويلة ابتدت المنحني ينزل للاسفل وبسرعة ومش عارفين السبب ايه ودا اللي بيخلي البعض يتحسر علي الايام السابقة بعد اللي شافوه من ازمة العيش والانابيب والبنزين علي الرغم ان الحاجات دي كانت موجودة من قبل واكتر بس الناس مصرة تربطها بالثورة واحد الاسباب ان الثوار كانوا مصرين علي تنحي مبارك من غير ما يكون ليهم اي خطة بديلة  , سابنا واحنا في نص البحر لا بنعرف نعوم ولا معانا مركب .
واللي اتضح اكتر ان الفساد مش ف شخص الرئيس , النخبة سبب اكبر ازمة انهم ضحكوا علينا بان مبارك هو راس الفساد لو قضينا عليه يبقي نقضي علي جسده , بس جسده مستشري في كل المؤسسات الحكومية
مش عارفة هل الاشتراكيين الثوريين عندهم حق لما قالوا يجب هدم المؤسسات وبناءها من جديد لانهم محقين من ناحية ان اللي اتغير حاجات صورية بس مش جوهرية

ولا حاجة بتحوق فيهم

دا نص الشكوي اللي قدمته باسم بابا
لقد تكليفي في يناير عام الفين وثمانمائة للعمل موجها ماليا واداريا بادارة الاقصر التعليمية واديت عملي بما يرضي الله الي ان قدمت شكاوي عديدة بوجود مخالفات مالية كثيرة بمئات الالاف من الجنيهات متورط فيها كل من السيد احمد رفاعي علي المصري والسيد محمود عبد النعيم شحات  وعندما رفضت انا وزميلتي المساومات علي عدم قول الحقيقة  جن جنونهم واستغلوا معارفهم لاستبعادنامن الوجيه المالي بحجة اننا من حملة المؤهلات المتوسطة  علما بان المديرية بما ما يقرب من خمسين حامل لمؤهل متوسط . وتمادوا في الفساد حتي وصلت الدرجة  باحمد الرفاعي بان يتعدي علي معلمة فاضلة وسط صرح تعليمي وهي السيدةحنان جابر . وهذا قليل من كثير وعندي الادلة والمستندات التي تكشف سرقتهم واختلاسهم وللعلم اذا لم يتخذ اي شئ ضدهم فاني عازم علي اخذ حقي وبعد استنفاذ الطرق السلمية سالجا الي الاضراب عن الطعام وسيتم تصعيد الموقف  وهذا للعلم
حاسة اني بادن في مالطة الفساد متمكن ومشكلته انه شامل قطاعات كتيرة وكلهم شبكة متصلين ومنتفعين من بعض ويارب نقدر نزفهم للزنازين علشان الواحد يحس ان في امل في بكرة وان الحق غالب ولو بعد حين 

ابويا عايز يضرب عن الطعام

فساد عمره 7000 سنة واكتر
مش مصدقة اللي بيحصل دا كنت فاكرة ان الفساد طال فئة معينة من الشعب لكن الواضح انه متاصل جدا في نفوس كل الشعب الا ما رحم ربي .
ابويا بقاله سنة بيحارب جزء ضئيل من الفساد ومش عارف , اكتشف سرقة واختلاس بمئات الالاف في مبني المفروض يكون قدوة في النزاهة في ادارة الاقصر التعليمية . قام بواجبه كموجه مالي واداري لقي في فلوس كتيرة في النص ضايعة .
قدم بلاغات للنيابة الادارية والرقابة المالية دا وصلت بيه الدرجة انه قدم بلاغات الي النائب العام والي عصام شرف شخصيا وبردوا لم يتغير شئ كاننا لسا عايشين الامس . ازاي ناس بتستحل فلوس حرام وزاي ليهم عين يتكلموا بعد كدة ياريتهم حتي سكتوا دول دلوقتي بيطالبوا انهم ينقلوا بابا من التوجيه علشان يخلالهم الجو ويعرفوا يسرقوا كويس .
معقولة ادارة الاقصر التعليمية تبقي ادارة الحرامية من كبيرهم لصغيرهم .
مفيش قدامنا دلوقتي غير اللجوء لله طبعا ثم المجتمعات المدنية زي حقوق الانسان واتحاد الشباب عايزين نخليها قضية راي عام خاااااصة بعد ما بابا قرر انه هيضرب عن الطعام  لو لم يتخذ اي اجراء ضد المحختلسين.
المشكلة انهم عصابة بداية من مدير الادارة وما تحته كلهم مستفيدين من النظام الحالي بتاعهم اسرق وعيش ومحدش هيكشفك علشان احنا عندنا ضهر في النيابة الادارية وواصلين اااوي
دي مش اول واقعة يكتشف فيها فساد بس بجد انا متمسكة بالقضية دي نفسي اشوفهم متكلبشين  وازفهم  ساعتها هحس ان الحق انتصر علي الباطل

ابوهم علي ابو اللي ينتخبهم تاني

الاخوان مصرين يكرهوا الناس في عيشتهم   ويرجعوهم لعصر ما قبل الاسلام  مع انهم اغلبية في البرلمان ويقدروا يحببوا الناس فيهم ويغيروا الفكرة عنهم . معقولة الاستفزاز دا كله النائب محمد العمدة وكيل اللجنة التشريعية بمجلس الشعب  متعصب للرجالة بينادي بالغاء قانون الخلع هو الراجل دا خايف يبقي مخلوع ولا ايه . حاجة ربنا شرعها للمراة علشان تخلص من جوازة فاشلة من واحد مش طايقة تعيش معاه . ياراجل دي المراة اللي ذهبت للرسول عليه الصلاة والسلام علشان عايزة تسيب جوزها لا قالتله انه مش كويس ولا ان اخلاقه وحشة  ولا انه مش بيديها حقها , السبب بس انها مش عايزة تعيش معاه وكل ما بتشوفه مع ناس بتلاقيه اقصرهم واوحشهم . السبب دا لو كان لامراة  من العصر دا كنا قلنا عليها ست هايفة  وملهاش حق طالما جوزها بيعاملها بالحسني .

وبعدين راجل مين دا اللي يقبل علي نفسه انه يجبر ست انها تعيش معاه غصب عنها  اكيد دا ذكر مش ولا بد . 

انا ممكن اوافق سيادة النائب الفاهم اكترمن اي حد اننا نلغي قانون الخلع ونقلص حرية المراة اللي اقرها الاسلام بس في المقابل اننا نقلص الطلاق بدل تلاتة يبقوا وحدة بس .

ياريت الناس اللي جاية بعد الاسلام ب14 قرن تقعد ساكتة ومتحاولش تعدل علي قوانين وحريات ربنا كفلها للمراة في الاسلام .

مش عارفة ليه الاخوان والسلفيين اللي انقضوا علي المجلس وعملوه لحسابهم  سايبين الراجل دا يتكلم الا بقي لو كانوا مظبطينها مع بعض  , بجد الاخوان دول مسكوا الحكم وعايزين كل حاجة تتغير حسب اهواءهم وافكارهم الشخصية بس ياريت وهما في طريقهم لتغيير لمصر يعملوا حساب ان في ثوابت مينفعش تتغير طالما مش بتتعارض مع الدين 

واهي غلطة وبنتعلم منها ويارب المجلس دا يتحل علشان الاشكال دي تحل عنا وننتخب ناس جديرة بانها تقود مصر لقدام مش لورا .
بانوا بانوا بانوا بانوا علي اصلكوا بانوا 

اسهل وصفة سمك بالفرن

شفت فيديو لمنال العالم بتعمل فيه سمك في الفرن بطريقة سهلة جدا ومش بتاخد وقت
نجيب سمك فيليه ونتبله , بعدين نجيب شرايح جزر وفلفل اخضر , نلف كل قطعة سمك فيليه وبداخلها عصيان الجزر والفلفل زي المحشي ونرصها في صينية ونحط زيت ونقطع الليمون عليها ونغطيها بورق فويل ونعمل فيها خرم كتير علشان السمك بينزل ميه وندخلها في الفرن لغاية ما تستوي مش بتاخد وقت طويل حوالي ربع ساعة وبس وبالهناوالشفا 

كيكتي باظت

لما كنت في اولي اعدادي قريت طريقة عمل الكيك الاسفنجي علي  ورقة كريم شانتيه وما شاء الله عليا عملتها مظبوطة من اول مرة وطلعت تمام التمام وفضل علي الحال دا كل ما اعملها تطلع منفوخة وحلوة وعمرها ما باظت مني . كنت بعملها ب 5 بيضات وبتملي الصينية الكبيرة كلها . لكن كحال الدنيا ابتديت افقد موهبة عمل الكيكة شيئا فشيئا الي ان وصل بيا الحال اني مبقتش اعرف اعملها خالص . السنة اللي فاتت كنت عايزة اعمل لاخويا عيد ميلاد  وجبت كل مكونات الكيكة وكان عندي امل انها تطلع حلوة ,,,,, كنت بقي كسفتني بنت الايه وهبطت قلت لازم اصر علي الحاجة  يا انا يا هي  , عيد ميلاد عمتي في نفس شهر اخويا رحت قررت بردوا اعمل كيكة اسفنجية  وراجعت غلطات المرة اللي فاتت علشان اتجنبها ز اعمل ايه دلوقتي الكيكة بردوا باظت هههههههه وحلمي ضاع اني افرحها بقت عاملة زي البسكويت وكل ما بتبرد اكتر كل ما بتلزق علي بعضها اكتر . اخويا بقي مينفعش يعدي الموضوع كدة من غير ما يتريق , جاب عود كبريت وغرزه في الكيكة اللازقة علي بعضها وولهعهم , شكلها كان وحش خالص وعمتي زعقتله ههههههههههههههه. 

بما اني بستفاد من غلطاتي السنة دي قررت اني مفقدش الامل واحاول مرة تانية عملت 4 كيكات وكلهم بايظين زي سابقاتهم . اللي مستغرباله انهم في البيت عندهم امل اني في يوم من الايام هرجع اعرف اعمل الكيكة 

يا سلااااااااااااام احلي حاجة في الدنيا انك تلاقي حد بيشجعك حتي لو اللي بيشجعك عارف انك مش هتقدر تعمل الحاجة دي  وكمان مش هامه البيض اللي عمالة اكسر فيه علي الفاضي 

بجد بحلم اني اعمل كيكة  اللي يعرف يقولي ازاي علشان انا خلاص  تعبت

استفتاء في محطة القطار

السنة الماضية وفي محطة القطار بدات اولي خطواتي العملية في معرفة مدي تاييد مرشحين الرئاسة وحقيقة لم اصدم بالنتائج لان دائما الشعب المصري يسيطر علي غالبيته فكر معين . احينا كنت اتعجب من اختياراتهم واحيانا اخر كنت فرحة عندما يوافق اختيارهم اختياري  وما اريد . حتما لم اقم بالاستفتاء علي المرشحين الحاليين لان بعضهم اعلن ترشيحه في نهاية العام الماضي لذلك كانت قائمتي تضم الفريق احمد شفيق واللواء عمر سليمان ودكتور محمد البرادعي و عمرو موسي . مع اني لو كنت اضفت لهم الشيخ حازم صلاح والدكتور عبد المنعم ابو الفتوح لكانت اختلت الموازين . في قرارة نفسي ادعم الفريق احمد شفيق ولكني كنت لا اصرح بذلك عند اخذ الاصوات .
كان البعض يبتسم مستغربا مما كنت افعل لربما انني  بنت صعيدية  ولم يروا شيئا من قبل كهذا .
قد تكون النتجية صادمة للبعض حيث حصل الفريق احمد شفيق علي اعلي نسبة اصوات , يليه اللواء عمر سليمان بالتساوي مع عمرو موسي اما دكتو رالبرادعي فلم يحصل الا علي صوتين احدهما لصديقتي والاخر لفتاة في القطار زعما منهم انه المناسب للوقت الذي تمر فيه مصر  واننا نريد شخص رئيسا متفتحا ينقل مصر من عهد الي اخر يتوافق مع ما تمر به البلدان العربية من نهضة اقتصادية ابت ان تمر بمصر .
هذا كان تقريبا من سنة ولو كررت التجربة مرة اخري في اعتقادي تتساوي الاصوات للشيخ حازم صلاح ودكتور ابو الفتوح وستكون المفاضلة بينهم وفي اعتقادي ايضا ان الرئيس القادم واحدا منهم  وهذا لا يضرني كمؤيدة للفريق احمد شفيق ولكني اعد نفسي ان اتقبل ما يمكن ان يحدث وان اقرب بين وجهات نظرهم وطرق تفكيرهم مع ما اريد في الرئيس القادم .
الوقت الحالي لا يسعنا ان ننتخب شخص  بعينه بناء علي انتمائه لجماعة معينة ولكن لبرنامجه  وما هي خططه لخروج مصر من ازمتها  وعليه يحمل عبئا كبيرا ارتضاه لنفسه لذلك وجب عليه ان يتمه باقصي جهده  والا ينكر فضل الله عليه ثم فضل الشعب الذي اختاره والا يركن الي  تفكير معين يخدم مصلحة اشخاص وجماعات بعينهم لكن ان يجمع الجميع تحت ظل قسمه امام الله برعاية هذا الشعب . 

المرشحين المجانين للرئاسة

حاجة غريبة لما تلاقي فوق 900 مرشح لمنصب واحد!!!!!!!!! لا ومش اي منصب دامنصب رئيس جمهورية مصر العربية واللي لازم يكون متوافر فيه بعض الصفات المهمة والمؤهلات اللي تمكنه من ادارة بلد بحجم مصر . علشان كدة محدش يقدر علي الشغلانة دي الا قلة قليلة ! وهما طبعا ال900 والقابلين للزيادة في اي وقت .

احد المرشحين المحتملين والذي اثار ضجة اعلامية كبيرة وتهافتت القنوات علي استضافته هو العلامة الفذ الدكر الجراح الفاجر القادر اللي عبر ببسطاته عن مصر عاوزة ايه . او تقريبا زي ما ناس تهكمت عليه وقالت هي مصر ولا غادة عبدالرازق؟؟!!!

للاسف مقدرش الوم الراجل دا اللي لقي فرصة انه يطلع في التلفيزيون ويشتهر لكن الوم المذيعة اللي استضافته واللي عملوا منه مادة اعلامية تهكمية علي المرشحين للرئاسة بس دا طبعا العادي من اعلامنا الشفاف الهادف المناضل الصادق .

بس شامة ريحة مش كويسة في الموضوع دا وممكن اصيب او اخطا لكن اللي بيحصل دا مش طبيعي ابدا وخطرلي ان ممكن يكون بعض الناس اللي عايزين يعملوا شو اعلامي قاموا ماجرين كان واحد يعملوا الدور الجديد دا بعد ما افتكست كل محاولاتهم لجذب انتباه المشاهدين . الجراح دا نسخة مبسطة من البقية تقول ايه علي اللص التائب مع مستر معتز الدمرداش ؟ واحد كتر خيره اتصل بالبرنامج وقال من اللي بشوفه دا ولا يوم من ايامك يا مبارك وبصراحة الراجل عنده حق مع احترامي لكل الناس بس المرشحين دول قمة المهزلة  والمهزلة بانت اكتر لما عمنا المرشح اللص التائب قام زعل من كلام المتصل وساب البرنامج وفقعنا بزغروته !!

طب قولولي يا ناس مش مبارك ارحم من اللي بيحصل ؟؟؟ هتقولوا لا؟ هقولكم خدوا دي كمان واحد قد جدي ماسك العلم الاخضر القديم بتاع مصر وبيقول انه الابن الشرعي للملك فاروق وانه رافع قضية نسب . ااااااااااه يا زمن 

خد دي كمان واحد تقريبا في حاجة في مخه مش مظبوطة بيقول انه اخر سلالة ادم . ابو مريم وجد عيسي . يا جدعان حد يقولي ان دا مش كابوس. معقولة دا يكون الواقع اللي عايشينه في مصر . 

صحيح ان في ناس كتير متضررين من حكم  مبارك لكن مش معني كدة اننا  نخليها سبهللة اي حد يمسكها والسلام المهم  ميكونش  مبارك ولا اي حد من نظامه .

نفسي يكون من شروط الترشح للرئاسة ان يكون المرشح متمتع بكامل قواه العقلية مش كل همنا انه يكون مش متجوز من اجنبية ولا معاه جنسية تانية طبعا الشروط دي مهمة بس الاهم فالمهم 

دكاترة اداب انجليزي بوظوا التعليم

اجمل حاجة في الادب الانجليزي مش مجرد انك بتتعلم لغة الموضوع اكبر من كدة بكتير . من خلال قراءة الروايات والقصص القصيرة  بتقدر تعرف حضارة وثقافة الشعوب وطريقة تفكيرهم  وتقدر تقارن بين الحضارة العربية والانجليزية , تشوف المشترك والمختلف وولما تتناقش مع حد انجليزي يبقي دليلك من عندهم (وشهد شاهد من اهلها ) . وحتي لو كانت الروايات والمسرحيات بتبعد عن الواقع زي مثلا مسرحيات شكسبير اللي بسميها مسرحيات العفاريت , دايما تلاقي اكتر من عنصر خارق للطبيعة في مسرحية واحدة , لكن تظل شاهد       علي الحضارة لانها متاثرة بجو العصر اللي اتكتبت فيه (the social background)  وخلفية الكاتب نفسه يعني بتبقي خليط من خلفية العصر اللي عاش فيه الكاتب وخلفية الكاتب نفسه زي حياته الاجتماعية وتعليمه وديناته وفكره وحالته النفسية  وعنصر البهارات اللي كان في الوقت دا بيجذب الناس للمسرحيات .
بس للاسف كلية اداب انجليزي بقت مملة جدا ومش بنستمتع باي رواية او مسرحية لانها اتحولت لان الدكتور يدينا كام سؤال علي الرواية كلها مثلا  ويجيب منهم كام واحد في الامتحان مع اني بجيب امتياز مع الدكتور دا بس طريقة الشرح وعرض الرواية مش فعال خالص .
اما بقي دكتورة النقد الادبي دي مش عارفين عايزة مننا ايه بالظبط الواحد يذاكر مش نافع ميذاكرش بردوا مش نافع مش بجيب معاها غير مقبول او جيد  لكن عمري ما جبت تقدير اعلي حتي لو ذاكرت اكتر , حتي لو قعدت اذكر المادة من اول السنة . فقررت النص دا اني مفتحش الكتاب غير علي الامتحانات علشان علي الاقل محسش بالندم اني ذاكرت المادة ومجبتش تقدير . في ناس بتقول ان الدكتور دي كانت جايبة مقبول في الكلية وبالواسطة اتعينت معيدة بس الله اعلم مش عارفة الكلام دا صح ولا لأ  , كل اللي يهمني انها طول المحاضرة تفضل تكلم نفسها بصوت واطي كانها بتشرح يعني واول ما تسمع حد بيتكلم تقعد تزعق  وتقول ايه الاسلوب الهمجي و البربرية بتعتكم دي .
نيجي بقي للاستاذ الدكتور اللي بيدينا ترجمة فرحان اوي انه اخد درجة الاستاذية كل ما يدخل محاضرة يقول انا اخدت الدرجة نروح نصقفله يدخل محاضرة لحد تاني يقول بردوا نفس الكلام ويصقفوله , ومطلع غلبه كله علينا . بيحملنا  ذنب المجتمع كل شوية انا عملت وانا سويت , وصلت بيه لدرجة انه اهان العامل قدامنا وزعقله, من ساعتها وهو نزل من نظرنا
الابن البار للدكتور دا استاذ مساعد  تحسه انه دكتور الترجمة بس علي صغير مش بنحبه خااااااالص علشان تقريبا فيه نفس الصفات بس علي كبير الله اعلم لو بقي دكتور هيعمل في الطلبة ايه . انا وصحبتي من الاقصر وكليتنا في قنا بنسافر كل يوم الصبح والقطار الساعة 7 ونص والمحاضرة الساعة 8 بنستاذن منه علشان ندخل متاخرين لانا بنكون جايين من سفر و صحبتي وقفته بعد المحاضرة بتقوله يا دكتور معلش احنا مش ساكنين وبنسافر كل يوم وبنوصل 8 ونص قالها خلاص متحضريش  باسلوب  من وحاشته   قعدنا نضحك عليه

مما قرات واعجبني 

ولدي العزيز: فى يوم من الأيام ستراني عجوزا .. غير منطقيه فى تصرفاتى!!
عندها من فضلك أعطينى بعض الوقت وبعض الصبر لتفهمنى
وعندما ترتعش يدي فيسقط طعامي على صدري
... وعندما لا أقوى على لبس ثيابي فتحلى بالصبر معي
وتذكر سنوات مرت وأنا أعلمك ما لا أستطيع فعله اليوم !!
إن لم أعد أنيقة جميلة الرائحة !!! فلا تلمني
واذكر فى صغرك محاولاتى العديدة لأجعلك أنيقا جميل الرائحة
لا تضحك مني إذا رأيت جهلي وعدم فهمي لأمور جيلكم هذا ولكن ..
كن أنت عيني وعقلي لألحق بما فاتنى أنا من أدبتك أنا من علمتك كيف تواجه الحياة
فكيف تعلمنى اليوم ما يجب وما لا يجب ؟؟؟!!!
لا تملّ من ضعف ذاكرتي وبطء كلماتي وتفكيري أثناء محادثتك
لأن سعادتي من المحادثة الآن هي فقط أن أكون معك !!!
عندما تخذلني قدماي في حملي إلى المكان الذي أريده فكن عطوفا معي
وتذكر أني قد أخذت بيدك كثيرا لكي تستطيع أن تمشي
فلا تستحيي أبدا أن تأخذ بيدي اليوم فغدا ستبحث عن من يأخذ بيدك
إعلم أني لست مُـقبله على الحياة مثلك ولكني ببساطة أنتظر الموت !!!
فكن معي .. ولا تكن علىّ !!!!
عندما تتذكر شيئا من أخطاءي فاعلم أني لم أكن أريد دوما سوى مصلحتك
وأن أفضل ما تفعله معي الآن أن تغفر زلاتي .. وتستر عوراتي ..
غفر الله لك وسترك لا زالت ضحكاتك وابتسامتك تفرحني كما كنت صغيرا فلا تحرمني صحبتك !!!
كنت معك حين ولدت فكن معي حين أموت !

( وقضى رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا إِمَّا يَبْلُغَنَّ عِنْدَكَ الْكِبَرَ أَحَدُهُمَا أَوْ كِلَاهُمَا فَلَا تَقُلْ لَهُمَا أُفٍّ وَلَا تَنْهَرْهُمَا وَقُلْ لَهُمَا قَوْلًا كَرِيمًا (23) وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُلْ رَبِّ ارْحَمْهُمَا كَمَا رَبَّيَانِي صَغِيرًا (24) سورة الإسراء

Those who have read Jane Austen's Pride and Prejudice or even have watched the movie will know the woman i would like to be , who has changed a very pride man  who has always looked to her as inferior to him . Elizabeth Bennet is  a woman of everyday life , and ordinary young lady who dreams of a happy marriage built on love and mutual respect . Although she is from the middle class with ordinary beauty , she could make a man  from a very high class fell in love, she attracted him both physically and spiritually . 

الدنيا ربيع والجو بديع

مع اذان الفجر يطلع يوم جديد  بداية الربيع  والجو الجميل لا هو برد ولا حر , كل يوم فيه تحس انك بتمر بالفصول الاربعة في يوم واحد  عندنا في الاقصر صعيد مصر النهار بيبقي صيف  ولما بقي الشمس تطلع بتبقي سخنة خالص وبمجرد تمشي في حتة ضلة تلاقي الدنيا بردت تطلع منها تلاقي الجو حر  علي شوية هوا مرة ساقع ومرة سخن نيجي بقي بعد العصر بيبقي اجمل وقت للخروجات والفسح  الدنيا منورة والجو معتدل والشمس حلوة تبصلها تلاقيها مكسوفة واول ما ياذن المغرب يومنا يتقلب لشتاء  مش عارفين نلبس ايه نشتي ولا نصيف نشرب حاجة سخنة ولا ناكل ايس كريم  نخرج ولا نتكلفت في السرير ونام ومع ذلك يبقي جو مصر مميز في الربيع ياريت كل الناس تيجي عندنا وتجرب تقلب الجو بس مشكلته بيجيب برد وانفلونزا بقي وجيوب انفية وحساسية الانف والعين يعني ما شاء الله , بس ولا يهمكم يا جماعة كل دا مقدور عليه ان شاء الله  بالاحتياطات والوقاية
 . اه يا الاقصر عليكي وعلي جمالك في الشتاء والربيع انما في الصيف منصحكمش ابدا بالزيارة . يلا يا جماعة انتوا لسا قاعدين كله ينزل علي الاقصر 

ليلة حلوة

المفروض اسم المدونة حاول ان تنسي بس الليلة دي بحاول افتكر كل حاجة حلوة مرتبطة بكل امراة ربتني او ساعدت في تربيتي  , طبعا هو عيد الام والحمد لله جبت الهدايا وشايلاهم في دولابي . جبت لعمتي اكتر وحدة ليها فضل عليا ولامي ولصديقة العيلة . وعلشان مفرقش بينهم جبتلهم كلهم شنط وبووكات لكن عمتي طبعا جبتلها حاجة زيادة ولو اطول اجبلها كل الدنيا  . ربنا يخليهم ليا ويخلي كل ام  ويفرحها باولادها وربنا يرحم جميع موتي المسلمين ويصبر كل ام فقدت ابنها . وعلي الرغم من ان في شيوخ كتيييير بيقولوا انه بدعة لكن من وجهة نظي ان دي بدعة مستحبة لان مينفعش امي تشوف كل الناس بتجيب لامهاتهم هدية وانا لا  ودي حاجة بنعبر عن حبنا وشكرنا للتعب اللي شافوه في حياتهم علشان احنا نكبر ونبقي بني ادميين وعيد الام دا المفروض يبقي طول السنة وميقتصرش علي يوم واحد يعني حاول تفرح امك باي حاجة هي بتحبها سواء كان في 21 مارس او ا يناير او 31 ديسمبر ولو قدرت ياريت كل 365 يوم  يكونوا هنا وفرح لكل ام